Frå venstre Kjell Kristensen, Helge Hopen, Nils Marton Aadland og Bård Sandal

Forprosjektet, utarbeidd av trafikkplanleggjar Helge Hopen, vart presentert for media i dag. Prosjektet er kostnadsrekna til om lag 1,7 milliardar kroner og strekkjer seg over om lag 17 kilometer frå Herdla med undersjøiske tunnelar mellom Askøy og Meland og Meland og Radøy. I tillegg kjem ferjesamband mellom Askøy og Øygarden. Saman med seg hadde Aadland og Hopen dagleg leiar i Sambandet Vest AS, Bård Sandal, og Kjell Kristensen som representerer Askøy kommune i styret for Sambandet Vest AS.

Konkurrerer ikkje med andre vegprosjekt

Aadland understrekar at dette prosjektet ikkje konkurrerer med andre viktige samferdsleprosjekt i regionen.

- Sambandet Vest vert realisert etter prosjekt som Nordhordlandspakken, Askøypakken og Sotrasambandet og konkurrerer ikkje med desse prosjekta. Men vi kan ikkje venta med planlegginga av dette prosjekta til dei andre vegprosjekta er ferdige, seier Aadland.

Målet for Sambandet Vest AS er å realisera tverrsamband mellom kommunane Øygarden, Askøy, Meland og Radøy for å binda saman olje- og gassdestinasjonane Kollsnes og Mongstad. Vidare er målet å sikra god transportkapasitet nord/sør på Askøy gjennom riksveg 562 mellom tverrsambandet og nytt Sotrasamband

Viktig for lokalt næringsliv og befolkningsutvikling

Ifølgje Helge Hopen syner trafikkanalysen at trafikkmengda vil liggja på mellom to og tre tusen ÅDT (år 2040). Det er registrert etter måten lite behov for ferje mellom Askøy og Øygarden. Tala syner eit behov på 200 ÅDT på ferjestrekninga.

- Den viktigaste effekten av dette sambandet vert betre rammevilkår for ei langsiktig utvikling av lokalt næringsliv og befolkningsutvikling. Sambandet vil redusera trafikkbelastninga mot Bergen. Her er tala usikre, og effekten vert ikkje rekna til å vera stor i normalsituasjonen. I ein krisesituasjon med stengte trafikkårer sentral rundt og i Bergen, vil dette tverrsambandet verta ein viktig alternativ omkjøringsveg, seier Helge Hopen.

Oversiktskart

Bompengar vert ein viktig del av finansieringa av Sambandet Vest. Eigenfinansieringa er førebels rekna til 400 millionar kroner innanfor ein bompengeperiode på 15 år. Ferjesambandet mellom Askøy og Øygarden er avhengig av eit driftstilskot på sju millionar kroner i året.

- Vi arbeider for mest mogleg offentleg tilskot til prosjektet. Dette prosjektet kan også verta ein del av ein større finansieringspakke. Det er også aktuelt å finansiera delar av tverrsambandet med tilskot frå næringslivet, seier Nils Marton Aadland.

Sambandet Vest vart stifta i 2010 og har følgjande aksjonærar og eigarar: Austrheim kommune, Bergen kommune, Fjell kommune, Lindås kommune, Meland kommune, Øygarden kommune, Sund kommune, Radøy kommune og Askøy kommune. I tillegg er Frank Mohn AS, Framo Engineering AS og BKK aksjonærar i selskapet.

Tekst og foto: Vigleik Brekke

Fylkesrådmann Paul M. Nilsen

Det sa fylkesrådmann Paul M. Nilsen då han innleia på Tinget i Vest i Sund i dag med temaet “Kvifor regionalt samarbeid?”. Tinget i Vest er samansett av formannskapa i dei fire kommunane i region vest, Askøy, Fjell, Sund og Øygarden. Ei engasjert forsamling deltok i ordskiftet etter dei ulike innlegga. Nilsen synte til fleire vegprosjekt som døme på der samarbeid er viktig.

- Eg vil gje skryt både til Bømlo og Askøy kommunar som har utarbeidd vegpakkar. Prosjektet på Askøy er ikkje på stortingskartet ennå, men på god veg, sa Nilsen.

Sotrasambandet

Nilsen snakka også om Sotrasambandet.

- Alt ligg til rette for nytt sotrasamband. Problemstillingane på bergenssida vert nok løyst, det er eg ikkje uroleg for, men det er ei utfordring at prosjektet vil ta tid sjølv om alt går på skinner. Føresetnadene for at det skal gå bra ligg her i kommunane. Dersom ikkje kreftene vert sameina, stoppar det lett opp, sa fylkesrådmann Paul M. Nilsen.

Tankar om samarbeidet i regionrådet

Om lag 30 deltakarar var på plass på Tinget i Vest

Styreleiar Ove Bernt Trellevik (ordførar i Sund) tok opp spørsmålet om Regionrådet Vest har vorte det som var tanken bak etableringa. Ifølgje Trellevik har ein lukkast svært godt med samhandlingsreforma, medan samferdsleprosjekt i liten grad har vore på dagsorden.

- Dei ulike vegprosjekta som Sotrasambandet og Tverrsambandet har vore lite diskutert i regionrådet, sa Trellevik.

Sund-rådmann Gerhard Inge Storebø og rådmann i Fjell, Steinar Nesse, orienterte om ulike samarbeidsprosjekt i regi av Regionrådet Vest. Nesse presenterte fleire samhandlingsprosjekt som intermediær avdeling på Straume, palliativ avdeling på Askøy, Øyane DPS, dialysesatellitt og JordmorHeim. Intermediær avdeling er eit pilotprosjekt til eit lokalmedisinsk senter med ei rekkje helse- og omsorgstilbod.

 75 prosjekt

I tillegg til samhandlingsreforma med sine ulike prosjekt, er det lista opp rundt 75 ulike prosjekt og tiltak der to, tre eller fleire kommunar samarbeider.

Gerhard Inge Storebø synte særleg til IKKUS (Interkommunalt kultursamarbeid) som er bygd nedanfrå og leia av kultursjefane i dei fire samarbeidskommunane. Andre samarbeid og felles tiltak i regionen er mellom anna strategisk næringsplan, Trigger AS, felles finansieringsordning for private barnehagar, felles tilsynsordning for barnehagar, det kriminalitetsførebyggjande tiltaket Felles Ansvar, internkontroll for økonomi, interkommunalt skattekontor, Betre Saman for barna, IKT, plan og oppmåling, Agenda-rapport om regional utvikling og tenesteproduksjon.

- Konklusjonen er at det er eit stort potensiale for samarbeid, men kanskje bør det arbeidast meir med overordna strategiar, sa Storebø.

Tekst og foto: Vigleik Brekke

Panorama Konferansehotell

Fylkesrådmann Paul Nilsen skal innleia over temaet “Kvifor regionalt samarbeid?”. Leiar i regionrådet Ove Bernt Trellevik (ordførar i Sund) skal  ha innleiande tankar om samarbeidet i regionen. Rådmann i Sund Gerhard Inge Storebø og Fjell-rådmann Steinar Nesse skal snakka om samhandlingsreforma og andre samarbeidsprosjekt i regionen.

Tinget i Vest er samansett av formannskapa i dei fire kommunane i region vest. Tinget skal ta opp utviklingstema for regionen til drøfting. Dette er ein politisk verkstad og møteplass, og det vert ikkje føreteke avrøysting eller avgjerder i dette organet. Tinget skal ha to møte i året. Møta går på omgang i dei fire kommunane i region vest, Askøy, Fjell, Sund og Øygarden.

Møtet vert halde på Panorama Konferansehotell.

Rutha Sangolt, Sund

Kulturskulesjef i Fjell, Bjørn Andersen, er godt nøgd med arrangementet.

- Kvaliteten på innslaga var i år høg, noko som gjorde sitt til at juryen hadde ei vanskeleg oppgåve med å plukka ut kven som skulle gå vidare til fylkesmønstringa. Eg vil på vegner av Fjell kommune, som hovudarrangør, retta ei stor takk til kommunane Askøy, Sund og Øygarden. Utan samarbeid med desse tre kommunane hadde ikkje arrangementet vorte så vellukka. Eg vil også takka alle som jobba for oss på sjølve dagane, slik at deltakarane fekk ein god UKM-dag, seier Bjørn Andersen.

Frå den flotte og kreative kunstpresentasjonen

Mellom klokka 12.00 og 21.30 framførte 180 ungdomar nesten 100 innslag. Oppslutnaden har stige med 50 prosent frå 2011 til 2012. Arrangementet i Fjell var pr. dato det klart største i Hordaland dette året. Frå Fjell er det 80 deltakarar med 37 innslag.

Dette er ikkje ein konkurranse. Juryen plukkar ut dei som går vidare og representerer heimkommunane sine på fylkesmønstringa 14. april.  Juryen såg særleg på originalitet, kreativitet, publikumskontakt og kvalitet. Deltakarane fekk visa fram talentet sitt i ei profesjonell ramme.

- Kommunane Askøy, Fjell, Sund og Øygarden har valt å samarbeida om UKM. Dette har gjeve høg kvalitet på programmet. Den store interessa viser igjen på deltakinga og viser at alle fire kommunane har fokus på kulturarbeid blant unge, sa fjellordførar Eli Årdal Berland då ho opna arrangementet.

Tekst og foto: Vigleik Brekke

Asbjørn Algrøy

Administrerande direktør i BRB, Asbjørn Algrøy, presenterte rapporten “Behov for næringsarealer i bergensregionen”  på styremøtet i Region Vest i dag (23. januar). Dette er ei oppfølging av eitt av tiltaka i strategisk næringsplan for bergensregionen.

- I løpet av dei neste 20 åra vil befolkninga auka med om lag 110 tusen innbyggjarar. Det er behov for 10 – 15 tusen dekar i bergensområdet, og det er viktig at både Bergen og distriktet står saman om ein strategi om utvikling av næringsareal, sa Algrøy.

Arbeidsgruppa går inn for at det i kvar av delregionane i region vest, region nord og bjørnefjordenregionen vert etablert eit forpliktande interkommunalt samarbeid for utvikling av kommunedelplan for næringsareal. Dette samarbeidet bør gjennomførast i nær dialog med Bergen kommune og fylkeskommunen. Tyngda av nye arbeidsplassar kjem innanfor kompetansebaserte og tilsetteintensive verksemder og

Illustrasjon knutepunkt

vert etablert i eller nær byane. – For å få ei bærekraftig utvikling, må arealkrevjande verksemder sentralt flyttast for å gje plass til verksemder som er basert på kompetanse, heiter det i rapporten.

Forprosjekt for Sambandet Vest

Styreleiar Nils Marton Aadland og prosjektleiar for Sambandet Vest, Terje Hopen, presenterte eit forprosjekt til det planlagte tverrsambandet mellom Øygarden og Nordhordland.

- Dersom alt går etter planen, kan vegprosjektet vera ein realitet i 2020. Målet er å få omtale i komande Nasjonal transportplan (NT) og at det vert sett av midlar til prosjektet i NT 2017-2028. Dette skal ikkje konkurrera med prosjekt som Sotrasambandet, Askøypakken og Nordhordlandspakken, sa Nils Marton Aadland.

Nils Marton Aadland

Prosjektet er kostnadsrekna til om lag to milliardar kroner. Tverrsambandet legg opp til ferje frå Øygarden til Herdla på Askøy med undersjøisk tunnel vidare til Meland og veg og tunnel til Radøy/Nordhordland. Sambandet skal sikra at Nordhordland, Askøy og Sotra/Øygarden vert eitt bru- og ein arbeidsmarknad. Målet er vidare at prosjektet skal utvikla eit ringvegsystem rundt Bergen som kan avlasta trafikkpresset i Bergen.

Tema i Tinget i Vest

Styret drøfta innhaldet i Tinget i vest 13. februar. Tinget i vest er samansett av formannskapa i dei fire samarbeidskommunane. Fylkesordførar Tom-Christer Nilsen vert invitert som gjestetalar på tingsetet. Det vert også presentasjon av dei ulike samarbeidsprosjekta i Regionrådet Vest. Møtet vart halde i Sund (Panorama Konferansehotell).

Økonomisk delingsnøkkel

Styret har bede om ei sak om den økonomiske delingsnøkkelen for utgifter i regionrådet. Etter
at Øygarden hadde styreleiar og sekretariatsansvaret dei to første åra, har Sund kommune overteke dette ansvaret ettersom Sund-ordførarar Ove Trellevik er styreleiar for 2012-2013. Sund kommune vil halda fram med å nytta Per Hillestad (Askøy kommune) som sekretær. Spørsmålet om eventuell endring av delingsnøkkelen vil styret koma tilbake til seinare. Ei endring av delingsnøkkelen må godkjennast av den einskilde kommune.

Felles bygningsvernkonsulent

Styreleiaren i regionrådet har hatt kontakt med fylkeskonservatoren med sikte på å oppretta ei felles stilling i region vest som bygningsvernkonsulent. Det er aktuelt med eit spleiselag der fylkeskommunen tek 50 prosent av kostnadene, medan resten vert fordelt på kommunane. Det er sendt søknad til Fylkesmannen om skjønsmidlar til stillinga. Det vert laga til ei felles sak for behandling i dei fire samarbeidskommunane.

Andre saker/meldingar

Styret drøfta korleis dei fire kommunane kan samkjøra styrerepresentasjonar. Det er semje om å samordna verv i råd/styre som Bergen og Omland havnevesen, Interkommunalt utval for akutt beredskap og Kystsogevekene. 

Regionrådet har gjeve uttale til fylket om rullering av skulebruksplan og TAF (tekniske og allmenne fag).

Melding om status for planane om lokalmedisinsk senter på Straume er sendt til regionrådet, Helse Bergen og kommunane som meldingssak.

  Tekst og foto: Vigleik Brekke

Fjell kommune er vertskap for møtet denne gongen

Møtet i styret for regionrådet denne gongen vert i Fjell rådhus. Dette er det første møtet etter det konstituerande møtet i regionrådet i november. Ny leiar for Regionrådet Vest er Sund-ordførar Ove Trellevik. Dermed har også Sund overteke sekretariatsfunksjonen etter at Øygarden kommune har hatt dette i 2010 og 2011.

På møtet på måndag vert det også ein presentasjon av eit forprosjekt Sambandet Vest har utarbeidd for eit tverrsamband mellom Øygarden, Askøy, Meland, Radøy, Austrheim og Lindås. Andre saker i regionstyremøtet er førebuing til Tinget i Vest, felles bygningsvernkonsulent, styrerepresentasjon og evt. endring av den økonomiske delingsnøkkelen i vedtekene.

Organisering og målsettingar

Etablerarforum Vest sikrar framdrift og tverrfagleg samhandling gjennom ei prosjektgruppe som er sett saman av deltakarar frå alle fire kommunar og alle etatar.

I år utgjer desse prosjektgruppa:

• Silvia Haugland, Øygarden rep. servicetorga
• Torstein Larsson, NAV
• Mikael Pedersen, NAV
• Bård Sandal, Askøy kommune
• Tone Boska, Gode sirklar

Vi har sett oss som mål å presentera tidsaktuelle problemstillingar i Etablerarforum Vest. Tema som står på agendaen skal spegla dei problemstillingar vi til ei kvar tid står over for i arbeidet som rettleiarar for nyetablerarar.

Samarbeid kompetansemiljø

Den siste tida har pågang frå arbeidsinnvandrarar auka, og med stadig større utfordringar i Europa i samband med Eurokrisa, er det lite truleg at denne gruppa vil minska med det fyrste. Dette er no tema som vi jobbar aktivt med å auka kunnskap og forståing rundt. Vi har samarbeid med Nav sentralt, HIB, UIB som alle sit på ulik spissa kunnskap. Vi skal utvikla rutinar, verkty og samhandlingsmetodar på tvers for å sikra god rettleiing som raskt kan utløysa ressursane og arbeidskraft vi treng i vår region.

Økonomisk støtte

Satsinga på Etablerarforum Vest er blitt lagt godt merke til og har no brei støtte hjå fylkeskommunen, Fylkesmannen og Innovasjon Norge. Satsinga har ført til auka økonomisk støtte til Etablerartenesta i 2012.

Tone Boska
Leiar i prosjektgruppa i Etablerarforum Vest

Gunn Olsen og Kjellfrid Tillung

- På denne måten får folk høve til å møta andre personar i same situasjon. Her vert det gjeve informasjon om sjukdomen og korleis dei pårørande kan takla situasjonen. Alle kommunar bør ha pårørandeskule, og Helsedirektoratet prioriterer dette høgt, seier geriatrisk sjukepleiar på Kvednatunet i Fjell, Kjellfrid Tillung.

Gode erfaringar frå 2011

Sjukepleiar i Askøy kommune, Gunn Olsen, seier at ved desse kursa vil dei pårørande få informasjon om demens og korleis dei skal forholda seg til sjukdomen.

- Vi har gode tilbakemeldingar frå kurset som vart halde i fjor. Deltakarane vart godt nøgde med det faglege innhaldet, og vi håpar at dei pårørande fekk gode kontaktar gjennom dette kurset, seier Olsen.

Kommunane gjennomfører pårørandeskulen i samarbeid med Nasjonalforeningen for folkehelsen, Askøy demensforening og Fjell, Sund og Øygarden demensforening. Helsedirektoratet har gjeve 25 tusen kroner i støtte til kurset.

I perioden 25. januar til 15. februar er det lagt opp til kurskveldar i alle dei fire kommunane. Tema som vert tekne opp er sjukdomslære og åtferdsendring, kommunikasjon og samhandling, lov, rett og økonomi, forvaltning, hjelpemiddel og det å vera pårørande. Her kan du lesa programmet for Pårørandeskulen.

Tekst og foto: Vigleik Brekke

Det var ordførar Siv Høgtun som delte ut prisen som var på 20 tusen kroner og diplom, skriv Askøy kommune på heimesida.

Frå venstre: Klaus Martin Jensen og Per Råd (grunneigarlaget), styreleiar i ANF Tone Haugland, dagleg leiar for Storebotn næringspark Kårleiv Bratli, ordførar Siv Høgtun og regionbanksjef i Nordea Oddmund Aarhus.

Grunneigarlaget får prisen for det gode arbeidet som er gjort gjennom lang tid med utvikling av Storebotn Næringspark. I sin tale sa ordføraren at prisen går til ei gruppe som allereie i 1991 samordna utmarksareala dei eigde i Storebotn og fekk dei omregulert til næringsformål. I dag er det etablert over 100 ulike bedrifter i parken og meir enn 500 personar har sin arbeidsplass der.

Store verdiar

- Det er bygd over 100.000 kvadratmeter med næringslokale som representerer store verdiar. Dersom ein med et lågt anslag reknar kr 10.000 pr kvadratmeter, representerer det bygningsverdiar for over 1 milliard kroner, sa Siv Høgtun.

Prisen er sett opp i samarbeid mellom Askøy Næringslivsforening (ANF), Askøy kommune og Nordea Bank Askøy.

Ulike tema vart drøfta i grupper. Frå venstre: Espen Hansmark Persen (Askøy), Maria Eilertsen (Askøy) og Bjørnar Blom (Øygarden).

- Det var flinke forelesarar her og vi fekk snakka om sentrale og vanskelege tema. Vi fekk også høve til å snakka med ungdomspolitikarar frå dei andre kommunane, seier Maria Eilertsen frå Askøy. Espen Hansmark Persen, også frå Askøy, seier at på denne samlinga fekk ein sjekka ut kor lagt UKS Askøy har kome i forhold til dei andre kommunane når det gjeld møteaktivitet og kor mykje pengar UKS har til disposisjon. 

På opplæringsdagen snakka ordførar Eli Årdal Berland om lokaldemokrati og korleis det vert avgjort kven som skal ha den politiske styringa i kommunen etter kommunevalet. Ho forklarte korleis den politiske organiseringa av Fjell kommune er bygd opp.

Ungdom kan påverka

Leiar av politisk sekretariat Grethe Bergsvik hadde foredrag om møteteknikk, møtereglar og skikk og bruk under møta. Ho minna om at det er møteleiar som er “sjef” og som skal sikra god møtekultur og framdrift. Viktige stikkord for skikk og bruk i møta er språkbruk, respekt, skilja mellom sak og person, presist frammøte og ro i møterommet.

Leiar av komité for plan og utvikling i Fjell, Jan Arthur Nilssen, hadde “Samfunnsutvikling, ungdomsmedverknad og korleis jobba for å fremja saker” som sitt tema. Han viste til korleis ein kan arbeida fram saker frå idé til realitet. Nilsen synte også til korleis ein med aktiv lobbyverksemd kan påverka samfunnsutviklinga via media, politikarar og byråkrati. 

Det var også stort engasjement under temaet “Møte med media”. Ungdomspolitikarane vart utfordra til å seia si meining om korleis media dekte 22. juli og dagane som følgde. Mange av deltakarane hadde fleire kritiske kommentarar og merknader til korleis media handterte den dramatiske hendinga på Utøya.

Tekst og foto: Vigleik Brekke